Christine Sanchez (Valonia, Belgika), Forêt Natureko aholkularia eta baso kudeatzaile profesionalak eta Tantai Baso Jabe Kooperatibako talde teknikoak "Baso mistoetan etenik gabeko estaldura mantentzen duen basogintza: Baso kudeaketa ereduaren eraldaketa euskal testuinguruan" ikastaroa eman dute urtarrilaren 28a eta 30a bitartean.
Plaza guztiak beteta, euriteak-eurite, basogintza eredu erresilienteago eta iraunkorrago baterantz lan egiteko beharrezko diren hainbat metodo eta estrategia partekatu eta ikasi ahal izan genituen.
Baso mistoetan etenik gabeko estaldura mantentzen duen kudeaketa ereduaren oinarriak landu genituen ikastaroaren lehen jardunaldi teorikoan. Eguraldiak baldintzatuta jardunaldi praktikoen ordena aldatu, eta kudeaketa eredu honen teknika garrantzitsuenari lehentasuna eman genion: seinalatzeari. Etorkizun oparoa izan dezakeen harizti eredugarri batean izan ginen, Tantaduin, Leintz-Gatzaga (Gipuzkoa). Horrelako egoera baten eta hainbat kudeaketa-agertokitan, basoa nola neurtu, planifikatu eta seinalatu landu genuen.
Arratsaldean, oso ohikoa bilakatzen ari den eszenatoki bat bisitatu genuen: estaldura jarraira iritsi den bertako hostozabalen landaketa bat. Kasu horretan jabeak, Aramaioko Udalak (Araba), bere basoetan kudeaketa eredua aldatzeko konpromisoa hartua du. Nola jokatu? Zein zuhaitz hobetsi? Noiz burutu lanak? Horiexek izan ziren landu ziren galderetako batzuk. Hotza eta euria egin arren, taldeak ez zuen zalantzarik izan antolatzaileen hurrengo proposamena onartzeko. Aurreko sailetik gertu zegoen Douglas izei unada bat bisitatzeko aukeraren aurrean, bertaratutakoek gogo bizia erakutsi zuten eta jardunaldia ilunabarreraino luzatu zen sail horretan burututako bakanketa lanen inguruan solasean geundela.
Urtarrilaren 30a, osteguna, azken hiletako egunik euritsuenetako bat izan zen Debagoienean. Unada desberdinak bisitatzen ari ginela "Ivo" ekaitzak hamaikak baino lehen haize gogorra eta 40 litro baino gehiago utzi zizkigun. Beste behin ere, bertaratutakoen gogo bizia klimari gailendu zitzaion, eta Tantai Baso Jabe Kooperatibaren bazkide erabiltzaileen unaden eraldaketa bideratzeko orduan hautatutako estrategia eta bizitako erronka desberdinak partekatu ahal izan genituen. Birsorkuntza maila desberdinak dituzten pinudi eta izeidi gaixoetan, estrategia desberdinak jarraituz burututako hostozabalen landaketetan, arraseko mozketen ondoren adin desberdinetako birsorkuntza duten unadetan edo insignis pinudi helduetan zeharkako eraldaketa nola egin aztertu genuen. Egoera horiek guztiak oso ohikoak dira Euskal Autonomia Erkidegoko isurialde kantauriarrean. Etenik gabeko estaldura mantentzen duen basogintzak eredu erregularrak baino erresilientzia handiagoarekin kudeatzen ditu basoak, eta, gainera, zuraren eta gainontzeko ekosistema zerbitzuen hornikuntza optimizatzen du.
Antolatzaileek eskerrak eman nahi dizkiegu bertaratutakoei eta Christineri oso egun aberasgarriak izan baitziren. Orobat, eskerrak eman nahi dizkiegu Leintz-Gatzagako Udaleko eta Aramaioko Udaleko ordezkariei gurekin egoteagatik eta, bereziki, bi egunetan oso gustura hartu genuen salda eta bazkaltzeko aterpea eskaintzeagatik.
Mila mila esker denori!
Tantai Baso Jabe Kooperatiba.
